We Belong To God

Jesuh cu a ka khamhtu le ka Bawipa asi, tiah na lungthin dihlak in na hun zumh bakin Thiang Thlarau pek na si. Cu Thiang Thlarau cu Pathian ta na si cang tiah a langhtertu hmelchunhnak asi. Khrih chungah kamhmi thluachuah vialte zong na co hrimhrim ve lai tiah a fehtertu zong cu Thiang Thlarau cu asi (Efesa 1:13-14). Pathian fa na si cang ti hmelchunnak zong Thiang Thlarau asi (Rom 8:9; 8;14). Fa na si ahcun rocotu zong na si colh. Kannih cu Khrih roco-hawi kan si (Rom 8:17).

Nang cu nangmah ta na si ti lo. Pathian ta na si cang. "Bawipa" ti a sullam cu "a ka ngeitu" tinak asi. Bawipa tiah na auh ahkhin a ka ngeitu na si tiah na auh he aa khat. Kannih cu Khrih ta kan si khawh nakhnga kan caah a nunnak a pek (Titus 2:14). Nangmah cu an zaangfah caah a thisen in cawkmi na si (1 Korin 6:19). Nangmah cu nangmah ta na si ti lo. Na kedong in na sampar tiang kha Pathian ta an si dih cang. Na nunnak le na caan zong amah ta an si. Cu a sullam cu kanmah duhning in khua kan sa kho ti lo tinak asi. Kan caah a nunnak a pe i a kan cawtu kan Bawipa duhning in khuasak thiammi kan si cio naklai a Thiang Thlarau thawnak in kan bawm ko cio ko seh!

We Were Crucified With Christ

Paul nih, "mi zeihmanh hi Khrih he an i pehtlaih ahcun mithar a si" (2 Cor. 5:17) a ti. Nain, Khrih kha cross cung i an khenh lio ah kanmah khenh kan si ve lo i a thihnak le thawhthannak kha zumhnak in kan i hrawm lo ahcun ahohmanh mithar kan si kho lo. Khrih an khenhnak ah an in khenh chih ve maw? Jesuh thihnak ah na thi ve maw? A thawhthannak ah na tho than ve maw?

Kan thih hmasa lo ahcun Khrih ah mithar kan si khawh lo bantuk in Khrih caah nun khawh asi fawn lo.

" I have been crucified with Christ. It is no longer I who live, but Christ who lives in me. And the life I now live in the flesh I live by faith in the Son of God, who loved me and gave himself for me." Galatians 2:20

Great Is Our Lord

1. Pathian cu kan thangtthat. Nain, thangtthat awk a tlak tluk in ahohmanh nih kan thangtthat kho lo.
2. Pathian dawtnak le a tthatnak cu kan chim. Nain, kan chim awk tluk in ahohmanh nih kan chim kho lo. 
3. Pathian sinah lawmhnak bia cu kan chim. Nain, kan chim awk tluk in ahohmanh nih kan chim kho lo. 
4. Pathian cu kan hngalh. Nain, kan hngalh awk tluk cun ahohmanh nih kan hngal kho lo. 
5. Pathian caah kan caan kan pek. Nain, kan pek awk tluk in ahohmanh nih kan pe kho lo. 
6. Bible ca cu kan rel. Nain, kan rel awk tluk in ahohmanh nih kan rel kho lo. 
7. Pathian caah kan temtuar. Nain, kan temtuar awk tluk in ahohmanh kan temtuar kho lo. 
8. Pathian rian kan kan tuan. Nain, kan tuan awk tluk in ahohmanh nih kan tuan kho lo. 
9. Pathian dawtnak le vel ngeihnak cu kan hngalh. Kan thinlung a kan khehkhuai i kan ttap. Nain, Pathian dawtnak le vel ngeihnak cu a thuh tuk caah kan hngalh awk tluk in kan hngal kho lo. 
10. Pathian sinah thla kan cam. Nain, kan cam awk tluk in ahohmanh kan cam kho lo.
11. Pathian cu kan dawt. Nain, kan dawt awk tluk in ahohmanh nih kan daw kho lo.  

"Kan Bawipa cu a lian a ngan i tthawnnak in a tling, thil a hngalhning hi tah khawh a si lo." Salm 147:5

"Maw ka nunnak, Bawipa cu thangtthat law zeitluk in dah zaangfahnak a ngeih kha philh hlah." Salm 103:2

God And God Alone

Pathian aa tel lonak nunnak cu pakpalawng asi. 
Pathian tel loin sianginn kai cu pakpalawng asi. 
Pathian aa tel lonak relationship cu ningzahnak phaktertu asi.
Pathian tel loin riantuan cu pakpalawng asi. 
Pathian aa tel lonak chungkhar cu pakpalawng asi. 
Pathian aa tel lonak Khrihfabu cu pakpalawng asi.
Pathian aa tel lonak ram cu pakpalawng asi.
Pathian pakhatnak a chia lomi miphun cu an lo tlau zau lai.
Be encouraged!

Kan thiannak Bawipa asi. 
Kan fimnak Bawipa asi. 
Kan damnak Bawipa asi.
Kan himnak Bawipa asi. 
Kan thazaang Bawipa asi.
Kan tthawnnak Bawipa asi.
Kan rumnak Bawipa asi.
Kan tthatnak Bawipa asi.
Kan dinfelnak Bawipa asi.
Kan hngalhnak Bawipa asi.
Kan i lawmhnak Bawipa asi.
Kan i dawhnak Bawipa asi.
Be encouraged!

"He alone is my rock and my salvation, my fortress; I shall not be greatly shaken." Psalm 62:2

Tukforhnak Kan In Tikah

"Tukforhnak nan cung i a tlungmi hi midang zong nih an in cio tawnmi an si ko. Pathian nih a biakamnak cu a zulh ko lai i nan in khawh leng tiangin tukforhnak cu nan cungah a tlunter lai lo. Tukforhnak nan in tikah in khawhnak thazaang an pek hna lai i chuah khawhnak lam zong an serpiak hna lai." 1 Korin 10:13 

"No temptation has overtaken you that is not common to man. God is faithful, and he will not let you be tempted beyond your ability, but with the temptation he will also provide the way of escape, that you may be able to endure it" (ESV) 1 Corinthians 10:13

When is come to temptation, you have two options: To please "self" or to please "God." Remember, we are not tempted more than we can handle. Jesus was fully man and fully God. He lives perfect life without any sin. Satan can't tempt him! God is faithful. He will find a way for us to escape from our temptations. God is faithful. Nothing is too big for him. Do Not Please Self. Deny it! Please God. He is faithful! 

Tukforhnak na in tikah duhthimnak pahnih na ngei: Na taksa duhnak tuahnak in maw nangmah le nangmah naa diriamhter lai, cu silo na Pathian dah na lawmhter lai? Jesuh kha kanmah bantuk minung arak si ve ko. Nain, Satan pa nih a tukforh kho lo. 

A cunglei Bible ah kan rel cang. Tukforhnak na cung i a tlungmi hi kan dihlak cungah a tlung ve ko. Thlarau lei ah kan i bochanmi kan pastor le evengelist pawl cung zongah a tlung ve ko.  Pathian Fapa hmanh pei tukforhnak a in cu. Nain, hihi philh hlah. Tukforhnak kan cungmi hi kan intuar khawh lomi an rak si lo. Pathian nih Satan pa nawl a pek caah Satan pa nih kan cungah tukforhnak a tlunter. Cucu Pathian caah hneksaknak a rak si i Satan pa caah tukforhnak a rak si (James 1:12-13). Kan Pathian cu zumh awk a tlak. Kan intuar khawh lo tiangin kan cungah a tlunter lo, tiah Bible ah kan rel cang (1 Corin 10:13). Tukforhnak kan in tikah intuar khawh nak thazaang zong a kan pek lai i chuah khawhnak lam zong a kan serpiak fawn lai. Tukforhnak kan in tikah chuah khawh lam a um zungzal. Pathian sinah thawnnak hal law na tei khawh ko lai. Thlacam hi zumtu kan caah thazaang tha bik asi. 

"Tukforhnak chungah nan luh nakhnga lo hngilh lo tein um u law thlacam tuah u." Matthai 26:41

Satan: Sual Puhtu

Satan cu sual puhtu asi (Biathlam 12:10). Vancung khua kan Pathian sinah sual a kan puhtu zungzaltu asi. Thil na tuah sualmi a um caan ah na lung chungah ruahnak tha lo (negative) a ra colh la. Mah nih khan Pathian he an hlattertu an rak si sual kho. Mah bantuk kha Satan pa sinin arami lawngte an si. I hlenter bak hlah. Satan nih sual a kan puh lio ah Pa Pathian sinah a kan nawlpiaktu Khrih kan ngei ve ko (1 John 2:1). Khrih kan lei a ttan ahcun aho nih dah a kan doh khawh lai (Rom 8:31) [?]. Kannih cu Thlarau laksawng phun kip co dingah Khrih chungah thim cangmi (Efesa 1:3).

Phone Nih Mitkuu-cim Lonak A Chuahpi

1. Minung kan thluak lei cathiam sang pawl nih study an tuahmi cu phone ah caan tam tuk a pemi cu an mitkuu a thaw kho lo, ti asi.

2. Phone na bih deuhdeh paoh le na ih siarem lo chin lengmang lai. Nai hngilh khawh lo a zual la, an ti.

3. Zaan ihlai ah phone a bih lengmangmi cu an i hngilh a tlai deuh fawn i an mitkuu a cim awk tluk in a cim kho lo, an ti.

4. Hihi zeiruang dah asi ti ahcun, kan phone kan bihmi a ceumi nih kan thluak hormone melatonin kha impact a hei tuah caah asi. Hi ruangah naitan iPhone ah updated tuahmi ah "Night Shift Feature" an tuahnak zong kha asi.

5. Phone le kan mit ai then kho lomi kan si ahcun hihi kan i ralringnak cio si hram ko seh. Na ih lo ahcun na ngan a dam lai lo. Na taksa an i rawk fawn lai. Riantuan naa harh lai. Nai hrawng election thawngpang kan bihnak ah zei khua kan hngal hna lo. A caan cu a si fam. Nain, buai awktlak lo tukmi ahcun kan buai deuh ko hna hih. Atu cu a lim cang caah kan thluak zong dinhter ve cang hna usih. Kan aukhuan lenmi nih zeihmanh a chuahpi lo cu kan zapi theih asi ko hih.

6. Kan phone chungah zeidah a um timi nakin, kan pawngah ahodah a um? Zei rian dah lim a herhmi um tihi kan tuaktaan deuh awk asi. Kan phone chungah a ummi minung zong buakpi tuk ding an si lem lo. Kan pawngte ah a ummi (unau, chungkhar, le hawikom) Pathian nih dawt ding i a kan fialmi hna hi tha tein chawnhbiak le dawt tu hi a biapi deuhmi asi. 

http://www.livescience.com/48193-how-blue-leds-changed-the-world.html

Kan Herhmi Kan Hngal Lo

Bawipa nih an dawt tuk. Na caah sian lomi a ngei lo. 

A Fapa ngeihchun hmanh na caah a zuah lo. Na herhmi vialte an pek dih. A Fapa ngeihchun hmanh na caah i a zuah lo ahcun thil dang na herhmi cu an pe tuk hnga lo maw? Nangmah le keimah sual in hrinmi hmanh nih mi cungah dawtnak kan ngeih ahcun dawtnak Pathian chinchin nih zeitluk in dah a ngeih chin lai? Kan halmi dihlak a kan pek dih tawn lonak cu, minung kan ruahnak in kan rak herh rua tiah kan rak ruahmi hi Pathian nih kan herhmi ah a ruah lo ruangah asi kho i, a caan a tlin rih lo ruang zongah a si kho. Laizaruh kha minung ruahnak cun a thi cang tiah ruah dih asi ko. Nain, Bawipa caah cun a tlai hlei lo. A caan a phak in a thawhter than ko. Minung nih kan herhmi hi kan rek hngal taktak lo. Kanmah nakin a kan sertu Pathian nih kan herhmi a hngalh deuh. Pathian cu na lungthin dihlak in i bochan ko. Kanmah bantuk in mi daithlang le mi lunglo asi lo. Kan Pathian cu zumh awk a tlak. 

"Bawipa nih, 'Ka ruahning cu nan ruahning a si lo, ka thil tining zong nan thil tining he an ikhat lo. Van khi vawlei nakin a let tampi in a san deuh bangin ka ruahning le ka thil tining zong nan ruahning le nan thil tining nakin a let tampi in a sang deuh." Isaiah 55:8-9

Khamh Na Si Taktak Maw?

Pathian nih an khamh taktak ahcun amah ta na si cang ti hmelchunhnak ah Thiang Thlarau an pekmi rian a tuan hrimhrim lai. Cu Thlarau cu na chungah rian a tuan lai i nikhat hnu nikhat Khrih muisam lo chin lengmang in an ser lai. Sual kha sual a si ti an hngalhter lai i sual tei khawhnak tthawnnak (power) zong an pek lai. A hlan na rak tlaihchanmi vawlei thil pawl kha pakpalawng asi ti an hngalhter lai. Thla na cam tikah na hnangam lai i lawmhnak in na khat lai. Na rawlthaw bik Bible asi lai. Biaktak chung na pil deuh paoh ah khamh a si rih lomi pawl caah dawtnak le siaherhnak lungthin na ngei deuh lai. Mithat lonak nakin nangmah that lonak naa hmu deuh thluahmah lai. Misual na si kha Thlarau nih an hngalhter lai i cu buin Pathian nih zeitluk in dah an dawt kha na hngalh lai. Lawmhnak biachim na diathlang lai lo. Thlarau lei in na tthang lai. Pathian nih a khamh taktakmi hna cu thangthat an huam rih lai. Zumtu fale he hawikomh an huam fawn lai. Teinak nun an ngei lai. Nain, vawlei an nun chung cu an perfect kho lai lo. Sihmanhsehlaw, Pathian nih a khamhnak taktakmi hna cu, sualnak an tuah sual caan ah Pathan ka ngaihchiatter ti kha Thlarau nih a hngalhter hna i an lungthin a kekkuai zungzal.. 

"Cucaah cun, nan chungah hi rian ttha a thawktu Pathian nih, Khrih Jesuh Ni ah hi rian cu a lim tiangin, a tuan zungzal lai." Filipi 1:6

Zeitindah Thiang Thlarau Thawnnak Kan Ngeih Khawh Lai?

Khrihfa nun ah a biapi bikmi zeidah asi hnga? Khrihfa kan nun ah a biapi bik cu tthan nun a si. Khrih hnu zulh asi. Khrih nawlcawl asi. Khrih lungput bantuk ngeih asi. Amah bantuk si hi nifatin kan i zuam ding asi. Biakam Thar chung kan rel tikah Khrih bantuk in nun ding kha voi tampi a kan cawnpiakmi kan hmuh. Nain, kan chan hi sualnak he a khat i thatlonak a tam tuk caah Khrih nawlcawn a har ngai tawn. Cucaah Khrih nawl kan cawn khawh ding ahcun Thiang Thlarau tthawnnak kan herh. Thiang Thlarau tthawnnak tal loin Khrih nawlcawn khawh asi. A hnu zulh khawh zong asi lo. Kan lung lawng nih a duh lai nain tthawnnak (power) kan ngei lai lo. Micheu cu teinak nun ngeih kan duh nain Bible rel zong kan huam lo. Thlacam zong kan huam lo. Thangthat le pumh khawmh zong kan huam fawn lo. Zeitin hme Thiang Thlarau tthawnnak cu kan ngeih khawh lai? Bible rel le thlacam nakin movie zoh le phone deh kan i thim chung cu kan derthawm peng ko lai. Sihmanhsehlaw, Khrih nawlcawn hi Bible nih a kan fial bantuk in kan duh taktak ahcun Thiang Thlarau sinin power kan ngei kho ko. Cucu kanmah minung lei nih kan tuahsernak nih a ngeih ve. Kan i palh lo dingah ka duhmi: khamhnak cu a lak tein kan hmuhmi Pathian vel zumhnak in kan cohlanmi asi. Tuahsernak aa tal lo (Efe. 2:8-9). Nain, Khrihfa kan sinak ah tthawnnak (power) le teinak nun kan ngeih khawh nakhnga a tanglei thil hi Bible nih tuah a kan fial ve:

1. Bible Rel
2. Thlacam
3. Thangtthat
4. Zumtu fale hna he i hawikom

Bible rel law thlacam lengmang. Atu le tu in Bible hi rel law thlacam ko. Pathian thangtthat zungzal. I pum lengmang. Zumtu ule nau he tonnak tibantuk zongah tal ve khawh i zuam. Minung cu kan derthawm tuk. Cucaah Thiang Thlarau tthawnnak kan herh zungzal. Zeitlun mi piangthar le Pathian mi hman zong nih an herh. Vawlei kan nun chung cu kan herh peng ko lai. Na lungdong hlah. Keimah pumpak hrimhrim nih hi thil hi ka ton cangmi an si. Hi thil pali kan tuahnak nih ka nunnak tampi a ka thlen; a ka remh. Voidang ah tehte ka khan te lai.

"Kanmah le Bawipa kha kan nawl nan kan cawn i temhinnak tampi nan huah nain Thiang Thlarau sinin a rami bia kha lawm tein nan cohlan." 1 Thesalon 1:6

Experience The Power Of God

Kan hmuh khawh lomi ram lak lily pangpar hmanh a thuamtu kan Pathian. Minung cu um rih seh, kan cung i a zuangmi vate hmanh nifatin rawl a petu hna kan Pathian. Kan cung vate pakhat hmanh khi Pathian nawlngeihnak tal loin vawlei ah an rak tla lo. Zeizong vialte cungah nawlngeitu kan Pathian. Amah tinhning in zeizong vialte hi an kal. Pathian nih tinhmi ngei in kan dihlak hi a kan ser. Nifatin in a thimi tampi lakah kannih zong a kan zaangfah i tinhmi ngeiin a sermi niceu dawh a kan hrawmh tthan. Kan derthawmnak a hngalh. Kan tthawnnak zong a hngalh. Cu bu cun rian zong a kan khinh. Kan ttuan khawh lo dingmi rian a kan fial lo. Kan Pathian hi carelnak le mi chimhnak lawng in hngalh i tim hlah. Na nunnak hrimhrim in a tthawnnak le zumh awktlak a sinak hi tep ve cang law na nunnak dihlak in nifatin i bochan ko. Kan Pathian cu zumh awk a tlak. 

"Hna theihnak lawngin nangmah cu kan rak in theih, sihmanhsehlaw atu cu ka mit in kan hmuh cang." Job 42:5

Job nih Pathian cu ka mit in kan hmuh cang ee, a ti. A mit in a hmuh taktakmi siloin a tthawnnak le zumh awktlak a sinak tu kha a nunnak in a teh cang caah asi. Kei zong tuzing ka thlacamnak lawng ah kaa fiang ve. Pathian ka hngalh ko ti cu a fawite ko. Nain, a kong relnak le mi nih chimhnak sawhsawh lawng in hngalh sual a fawi tuk. A tthawnnak le zumh awktlak Pathian a sinak hi teh kan nunnak in kan tep ve cang maw? Kan Pathian cu a nung. A kong relnak le mi chimnak sawhsawh lawngin hngalh kan i timh ding asi lo. Kan nunnak hrimhrim teh hi Pathian hngalh taktak cu an rak si!