God Is Love

The apostle John nih "Pathian cu dawtnak asi" (1 John 4:8) a kan ti. Micheu nih Pathian dawtnak kan chim/ruah tikah dawtnak hi Pathian nih a ngaihmi bantuk khin kan chim sual tawn. Kei zong ka rak si ve. Kan sual paoh ah Pathian nih a kan dawtnak hi a tlau rua, tiah kan ruah sual tawn. Cucaah sual phuhrunnak kan ngei i amah Pathian hmai ah thlacam hmanh kan ngam tawn lo. Hihi Satan pa hlennak lawngte asi. Satan cu sualpuhtu asi; Pathian sinah nifatin sual a kan phaw zungzal. Nain, Pathian kan lei a ttan ahcun aho nih dah a kan doh khawh lai? Amah Jesuh, kan caah a nunnak a pemi hmanh nih "na sual lo" tiah biakhiahnak a tuah cu (Rom 5, 8). 

Hihi nifatin na nunnak ah i chinchiah peng. John nih "Pathian cu dawtnak" asi timi hi Pathian a sinak khi a chimmi asi. Amah Pathian hrimhrim hi "dawtnak" asi. Pathian cu aa thleng bal lo (Malakhi 3:6).   Cucaah "Pathian dawtnak" cu zeitik hmanh aa thleng bal lo. Nihin le tuni zong aa dang lo. Pathian cu donghni a ngei lo bantukin a dawtnak zong donghni a ngai lo. Pathian cu a zungzal a hmunmi le a tthawngmi asi caah a dawtnak zong hi zungzal in a hmun i a tthawng ve. Pathian cu dawtnak asi. Cu a dawtnak cu hitin a langhter: kannih cu misual kan si ko rih lioah Khrih cu misual kan caah a thi (Rom 5:8). Jesuh Khrih na nunnak ah na cohlan ahcun Pathian dawtnak na tinco. Pathian dawtnak a tingcomi paoh cu Khrih ah sertharmi an si. Nunning hlun kha lo i nunning thar kha aa thok cang. Khrih dawtnak na co hnu ah na nunning aa thleng ve maw? Mithar na si cang kha philh sual lai ci awh? Bawipa nih thluachuah nih thluachuah kan pekpiak seh.