Vawlei kan um chung cu zeitik hmanh ah kan "perfect" kho hrim lai lo. Zeitluk a thlarau mi nule pa zong a caan ahcun sualnak he pehtlai in harnak an ton caan um ko la. Thlarau lei kaar ka hlan deuhdeuh i minung menmen zei hmanh kan rak si loning hi ka fiang i kan Pathian hi ka duh chin lengmang. Mipiangthar zong hi vawlei ahcun ahohmanh kan perfect kho lai lo. Laimi cu theology ah kan sifah tuk caah sualnak i an tluk sual caan ah kan khuaruah a har tawn. Nain, mipiangthar cu teinak nun kan ngei. Sualnak ah kan luat. Daihnak le lawmhnak kan ngei. Sual chiatserhnak in miluat kan si. Kan i ruahchanmi pakhat lawng a um i cucu Jesuh ratthan nii hi asi. Mi piangthar hna, kan thachia hlah seh. Kan Bawipa Jesuh ratthannak caan hi faakpi in hngak ko hna usih. A vanmi thiang hna he an rak ttum than te lai i amah bantuk ah a kan ser te ko lai. Amah bantuk kan si te lai i a sunparnak hrawmh kan si lai. Cucaah, hnulei thil kha philh in hmailei ah faak piin tli peng ko hna usih. Biapeh: Laimi cu theology ah kan sifaak tuk rih i mipiangthar nih sualnak hmete an tuah sual caan ah kan lau tawn. Sualnak a tuah kho bak ti lomi ahkhin kan ruah hna. Hihi "sualnak" kong Bible nih a kan cawnpiakmi tha tein kan i fian lo caah asi i Laimi theology kan sifahnak fam cu asi.
No comments:
Post a Comment