Na Theih Dingah Kan Duhpiakmi

Nangmah cu Pathian dawtmi fa na si (Efe. 5:1). Fa na si ahcun rocotu zong na si colh (Rom. 8:16). Khrih roco hawi kan si (Rom 8:17). Nangmah kha an dawt tuk caah a fapa ngeih chun te kha an pek (Joh 3:16). Nangmah cu Pathian nih Amah muisam keng in sermi na si (Gen 1:26). Cucu, hi vawleimi hna he nai dennak (identity) asi. Nangmah cu Pathian kutchuak na si (Eph.2:10). Nangmah cu Pathian nih amah duh tein an ser i cu an sernak ahcun biatak kha a hman. Cucaah, nangmah cu a sermi vialte lakah 'cungnung bik' na si (Jeim 1:18). Pathian nih tinhmi ngeiin sermi na si kha philh hlah. Ruahlo piin hi vawlei ah na nulepa nih an in hrinmi na si lo. Na chuah hlan khan Pathian nih an rak hngalh diam cang (Jere. 1:5).

Micheu cu mi hngar lawng kan thiam i Pathian nih sunglawi tuk in arak kan sermi kan si hi kan i philh tawn. Ahohmanh hngar ti hna hlah. Nangmah le nangmah kha i uang ve cang. Zeicahtiah, Pathian nih tinhmi ngeiin sermi na si. A sunparnak langhter dingah sermi na si (Eph. 2:10).! Saya Tuan Peng Thang nih vawleicung ah ka uar bikmi cu Tuan Peng Thang asi, a ti. Phundang in ruah ahcun porhlawt khi a lo ngai, nain kei cu ka lung a tling tuk. Kanmah le kanmah hi kan i uar bik ding asi. Zeicahtiah, ka chim cang bantuk khan Pathian nih tinhmi ngeiin sermi kan si -- accident in hrinmi kan si lo! 

Hitin rak chim ve: Keimah cu Pathian dawtmi fa ka si. Fa ka si caah rocotu zong ka si colh. Amah nih Amah duh tein a ka ser i a ka sernak ahcun biatak kha a hman. Cucaah a sermi vialte lak cungnung bik ka si. Sermi vialte lakah cungnung bik na si kha zeitik hmanh ah philh hlah!!

Pathian Kong Tampi In Hngalh I Zuam

Greek mifim hna nih minung caah activity a tha bikmi cu 'khuaruah' asi, an ti. Khrihfa mit in cu khuaruah cu kan van zohthan tikah 'Pathian kong ruah' hi minung caah a tha bikmi activity asi, ti asi. Pathian kong ruah ka ti tikah ruah sawhsawh lawng si loin Pathian a sinak (nature) le ziaza sining (character) kha Bible nih a kan cawnpiakning tein ralring tein ruah a herh. Hi zawn ahhin a biapi tuk. Zeicahtiah, Pathian kong hi tha tein an hngalh lo ruang le an ruah lo caah cawnpiaknak hman lo (cults) hi vawleicung ah tam tuk a chuak. 

Minung hi Pathian kong tlawm le tam kan hngalhmi nih nifatin kan nun hi lam a kan hruai, ti asi. Pathian kan thangthat tik zongah Pathian kong tlawm le tam kan hngalhmi ahhin aa hngat. Cucaah Pathian kong hi hngalh kan i zuam ding a biapi tuk. Pathian kong hngalh khawhnak dingah cauk le movie phunphun an chuah lulh cio. Nain, Pathian kong taktak hngalhnak ding caah an tha thlu nemmam lo. 

Minung nih Pathian kong kan hngalh khawhnak dingah a tha bikmi cu Bible Thiang asi. Pathian nih Bible a kan pek tikah biapi bikin aa tinhmi cu amah asinak (nature) le ziaza sining (character) kha kan hngalh khawh nakhnga ding caah asi bik, ti asi. Cucaah, Bible Thiang tampi in kan rel lawglawng ah Pathian kong kan hngalh khawh lai i, cu Pathian kong tlawm le tam kan hngalhmi nih nifatin kan nun hi lam a hruai lai. Zeitindah Bible Thiang nih Pathian kong cu an langhter van zoh tuah hna usih. 

Jonah cauk cu, Pathian nih vawleicung mi vialte cungah dawtnak le zaangfahnak a ngeihnak i, amah Pathian sinah amah he i hawikom dingin a kan auhnak kha kan hmuh. Hosea cauk zongah minung cung i dawtnak a ngeihnak kan hmuh fawn. Cun, Amos cauk ahcun Pathian a dinfelnak kha kan hmuh rih. Micah cauk zongah Pathian cu biaceihtu bawi asinak kha kan hmuh. Isaiah cauk kan rel tikah Pathian a thiannak le dawtnak in a kan tlanhnak kha kan hmuh khawh hoi. Cun, Johan cauk chung ahhin Pathian nih zeitluk in dah a kan dawt kha tampi kan hmuh. Zeidang cauk tampi kan banh hlan ah Pathian kong kan hngalhnak dingah a tha bikmi Bible hi tampi rel i zuam hna usih!

Together We Stand, Divided We Fall.

Malaysia kan rak um lio ah Cheras ah kan rak um. Cu lio ahcun Laimi kan rak tam tuk rih lo. A ummi hnih-khat tete hi kan rak ikom ngai. Chun zan in kan rak i leng tawn. Zeituah awk kan rak hngalh lo tuk caah ti kan rak i lio tawn. Kan lawipah in bawlung kan chuih. Cun, mi thei fir le vah-vaih lawngte kan rak rian tawn. Van chim ah lung a leng ngai. Hi lio kan dirhmun hi Imbi (khuapi) ah khuasami Lai mino CSO sianghngakchia cheukhat nih an rak kan nek ngai. Khuate fa an rak kan ti tawn. An rak kan nihsawh pah ziar. An mawh bak lo ka ti. Annih cu khuapi/khualai ummi hme an si fam cu. Sihmanhsehlaw, kan umnak ram a silomi le miphun dang lak i Laimi le Laimi mah ti kan rak i timi kha van ruahthan ah ngaih a chia ngai. Kan rak i dawt ding asi. Kan rak i dirkamh ding asi -- khoika ram kan phak paoh ah. 

Atu hi cu bantukdirhmun cu U.S ahhin kan phan than rua ka ti. Cheukhat hmurka in ka theihpah tawnmi le, ka mit lila zong nih ka hmuh tawnmi cu kum 2000 hrawng i U.S a rak phanmi (mi hmasa) Lai mino le 2010+ hnu in a rak phanmi Lai mino hi kan/an i kom kho bak lo. 2000 hawng i arak phan hmasami pawl hi group pakhat phun khin a ummi an um. 2010+ phanmi zong an um ve. Kan nunning le kan khuaruahning aa dan tuk ruang zongah a si kho men. Aruang tampi a um lai. Nain, cubantuk cu kan si awk asi loh. Kannih cu miphun tling pakhat kan sinain a hme taktak te khi kan si. Kan ram asi lomi miphun dang ram i kan thutdir lulh lio ahhin kan i dawt ding asi. Kan i dirkamh ding asi. Hi hnu kum 20, 30 hnu kan i dawt khawh ti lo sual si le Pathian nawl si seh. Nain, atu kan generation hrawng tal hi cu kan i dawt i kan i dirkamh ding asi. A group phun in um hi kan ngol awk asi. Hi bantuk group phun in a kan umtertu "gap" kan hrawh a herh. 

U.S ram ah arak phan hmasami kan si zongah a phankaa mi pawl hi kom ve hna usih. Daw hna usih. Hrinthanak a co cangmi zong nih a hrinthan ve rih lomi pawl hi thazaang pe hna usih. Cathiam zong nih ca cawng lo sinah thudir ve usih. Ruahnak cheu hna usih. Atu kan chan hmanh i kan i dawt lo ahcun hi hnu kum 20,30 ahcun zeitinhme thangthar mino hna nih kan miphun kan hruai khawh lai!