Knowing God: March 2016

Friday, March 11, 2016

Romans Catholic Seminary le Kei

Ohio ummi ka si caah voikhat cu umharphen ah Ohio state i seminary (Bible sianginn) pawl ka zoh hna. Google i a van chuakmi paoh ka hei bih thluamah ko hna i ruahlopi khin Athenaeum of Ohio -- Mount St. Manry's Seminary of the West timi ka hmuh. Hi sianginn cu college siloin seminary tu a si. Cincinnati, OH a um. A konglam tawite ka relmi nih a ka lauter tuk caah ka va zoh colh. Seminary le college hi an i dang ngaingai. Seminary cu B.A (bachelor) degree a dih cangmi hna nih Master le Doctorate degree an pehnak sianginn a si. Seminary hi Baibal lei in B.A degree a ngei lomi caah a tha khun an ti. Ohio state bantuk i khua sami mino ka si hi kaa lunghmuih tuk. Vawleicung level in mifim/mithiam tampi an chuahnak state a si. Kan fanu/fapa caah ruahchanank tampi a um. US ram president zong minung pasarih an chuak. Atu 2016 President i thimnak zongah Ohio governor John Kasich aa cuh rih hoi. Teinak a hmu te hnga dek maw.[?] Cun, Bible le vawlei lei fim cawnak (secular) sianginn tha zong an tor fawn. Ohio state kaa uangthlarnak hi voikhat cu ka tial te lai ka nain caan ka ngei rih lo. Zeisihmanh ah, hi sianginn nih a ka lauter tukmi cu hihi a si.

Hi seminary cu, U.S ram pumpuluk chung i Romans Catholic seminary vialte i a hlun bikmi lakah pathumnak a si. Kum 1829 ah Bishop Edward D. Fenwick nih a rak dirhmi a si. Atu ahcun kum 187 a rau cang. Hlan ahcun Saint Gregory Seminary ti zongin an rak auh. Address cu: 6616 Beechmonth Avenue, Cincinnati, OH 45230 a si. Ka umnak in minutes 30 hrawng mongh (drive) a si. An tlaihtleng (motto) cu, "To advance in wisdom, age and grace" ti a si.

Hi sianginn hi aa thlengnawng ngai. 1840 in St. Xavier College tiah an rak auh. 1879 ah tangka an rak harset ruangah kum riat chung an rak khar. 1890 ah an rak on than i a min ah St. Gregory Seminary tiah an rak thlen. 1906 ah, Archbishop Henry K. Moeller nih tinhmi sangpi he hi sianginn pi cu a van remh. A kum vui ah acres 16 Norwood city nih an rak hlut hna caah sianginn area zong an rak kauh. 1925 ah Archbishop John T. McNicholas nih cozah he aa pehtlaimi agent pakhat a rak ser. Cu agent cu Ohio cozah law tangah a um. Cucaah, Athenaeum of Ohio tiin March, 1928 ah min an rak bunh. Cu agent he cun komh in sianginn cacawnnak a herhmi vialte an rak thar chuah. Nain, an rak awngmin tuk lem loh. 1980 ah, sianghngakchia an rak tlawm tuk kum khat chung sianginn an rak khar hoi. (Cincinnati, OH ahhin, U.S ram pumputluk i Evangelical Baibal sianginn a hlun bikmi lakah palinak a simi zong a um rih. A min ah God's Bible College an ti.) A tanglei hmanthlak hna i ka van bih lio ah ka thlakmi an si. Enjoy! :)

Zohchunhmi Ca:

https://en.wikipedia.org/wiki/Athenaeum_of_Ohio

Billy Graham Museum le Kei

Kan hnu January 6-8, 2016 cu Chicago, IL ah ka kal. Chicago i pastor Van Lian Ceu nih Koreans pawl nih kum khat voikhat an tuahmi "One in Love" (OIL) retreat ah a ka sawm ve caah ka kal. A nuam dom. Thlarau lei in thazaang tam tuk ka lak lawng siloin ruahnak zong tampi kaa chap. A si awk a si ko. Chicago cu khuapi hme a si cu. U.S ram khuapi vialte lak i khuapi bik ah pathumnak khua cu pei a si fam cu.

Hi OIL conference ahhin, Koreans mi lawngte an si kan ti khawh. Zapi cu sawm an si ko nain a tam deuh hi cu Koreans an si. A fawinak cun, US um Laimi nih kum thum voikhat kan ngeihmi CBCUSA Civuipi bantuk le kum hnih voikhat tuahmi CYO bantuk khi anmah caah a si ve. Nain, an caan hmanning le an thiltuahning balte cu aa dang ngai. Cu bantukin aa dangmi, cun thil tha a si tungmi ko cu ka va cawn i kaa lunghmuih. Hi conference a rami hi mino lawnte kan si. A fawnak in, college sianghngakchia caah tuahmi a si. Aruang cu, kum thar sianginn van thokka a si caah kumpi kum khat chung sianginn kainak le kar kan hlannak ah Bawipa hi kan thinlung dihlak in sawm hna seh tikhi an i tinhmi a si.

Hi OIL conference ah a tam bikmi cu hlasak a si. Hla hi atu le tu in kan sa. A nuam taktak. Kan nun a zaang. Ka chungah lawmhnak a khat. Cun, Chicago local churches pastor le seminary saya pawl nih Pathian bia thatha an kan chimh. Chun ah small group in a kan than. Kan group cio he kan duhmi cawnnak paoh kan ithim i chun cawnnak kan ngei. Tlawmpal ah rawl kan ei. Cun, hla kan sa than. Pakhat le pakhat thla kan i campiak. Bible study kan tuah. A nuam kho tuk. Vawleicungah a nuam bik a si lai. Hi bantuk hin kanmah pumpak inn cio ah ngei peng kho hna usih law, Vanram nun cu ahopaoh nih kan tep dih cio hrimhrim ko lai. Pianthar zongah "tluk le rilh" timi hrim a um lai lo. Zeicatiah, Pathian thangthat, a sin thlacam le Bibal rel cu Thlaraumi hna caah kan rawl thaw bik a si. Amen!

Hi OIL conference cu Wheaton College ah an tuah. Hi college cu minthang a si. College a si nain a lian dom. University siseh law aa tlak ding a si. Hika college cu vawleicung evangelist minthang Billy Graham ca a rak cawnnak sianginn a si. Cucaah kaa lunghmuih khun. A ka sawmtu pastor Van Lian Ceu cung zongah kaa lawm fawn. Cun, kaa lunghmuih tuk rihmi pakhat cu Billy Graham museum ka va hmuhmi hi a si. Billy Graham nih degree a rak laknak sianginn pakhat a si caah amah philhlonak le upatnak in an tuahpiakmi a si theu lai. Wheaton College campus chung bakah special in an tuahpiak. A building a nganning. A chung van luh ah khuaruahhar a si -- a tiru. Kan pu Billy a thawngtha chimnak tuanbia vialte a tling. TV in a sermon tampi zong an thlah. Zoh a phu ngaingai. Billy Graham hi Biatak (the truth) bak a phuangmi a si caah ka upat tuk. Atu cu kum 97 a si cang. Charlotte, NC ah a um. Cucaah Charlotte, NC ah amah upatnak caah tiin Billy Graham Library zong an serpiak hoi. Pathian lungtongmi le Pathian mi hman pawl cu, vancung khua ah suiluchin an co lawng siloin vawlei hrimhrm ahhin thluachuah an co. Hi bantuk Pathian mi hman ca a rak cawnnak sianginn ka va phak khawhmi le a museum ka va hmuh khawh vemi cu kaa lunghmuih tuk. Cucaah, hman tampi ka thlak. A tanglei ah rak bih ve.