Happy Veteran's Day !!

Thinphan dai loin kan ram ithimnak kong kan cuanh lio ah US ram mipi nih an sunhlawih ngaimi Veteran’s Day ai thawhkehnak tuanbia zoh hna usih.

Happy Early Veteran’s Day!!

Thaizing cu, Veteran’s Day a si. Sianginn cheukhat an khar. Company zong an khar khawh men. Mi tampi nih Veteran’s Day le Memorial Day hi zeidah an idannak a si ti kan fiang tawn lo. Cucaah cun, a tawinak tein an i dannak zoh tuah hna usih.

Veteran’s Day kan ti lengmangmi hi, ralpi pakhatnak a rak dihkaa November 1, 1919 ahkhan, president Woodrow Wilson nih “Armistice Day” tiin a rak thokmi a si. November 11, 1918 ahkhan, ralpi pakhatnak cu a rak dih, US le Germany kar ah tha tein remnak an rak ser. Cun, daihnak vialte kan ser dih cang caah ralpi pakhatnak i ral tuk a kalmi le a thimi ralkap pawl upatnak kan pe hna lai, tiah sunglawi ngaiin an rak hmanmi a si. Sihmanhsehlaw, kum zeimawzat hnu ah ralpi pahnihnak a van tho than.

Tlawmpal ah communism ruangah “Cold War” timi a rak chuak than hoi. US ralkap siseh, Navy, Marines le Air Force pawl nih US ram caah ral an rak tu. Cucaah, Armistice Day cu Veteran's Day ah June 1, 1954 ah an rak thlen diam. Aruang cu, ram ca’h a nunnak a pemi vialte si hna seh, a nung rihmi ralkap si hna seh, an dihlak ai tluk tein upatnak kan pek hna la, tiah president Dwight D. Eisenhower a rak dirpi.

Veteran’s Day hi a rak buai ngai. US cozahpi nih, Veteran’s Day hi October zarh dongh lei nikhatni 1971 an rak thlen. Hi nithum chung day-off karlak ahhin ralkap a thimi he a nungmi he zalong tein upatnak pe hna seh. Khual hna tlawng hna seh, thlan hna kal hna seh tu an rak duh caah a si. Nain, cheukhat state nih an rak pom thlu kho ve hoi lo. A hmasa bik i rak tuahmi November 11 hi a tha ko, tiah zapi ruahnak a rak i hrawm kho lomi state an rak um. Cuti cun, kum zeimaw a kal hnu ah President Gerald R. Ford nih Veteran’s Day cu November 11 ah a rak thlenpiak hoi hna.

Cu ni thok cun, November 11 paohpaoh cu, US rampi a thimi he a nungmi he upatnak pek nii a hung si. Hi nii hi, Americans mipi nih an sunhlawih ngaimi nii pakhat a si. Memorial Day le Veteran’s Day hi ai lo pah ko. Memorial Day tu ahcun, ram ca’h bakah a nunnak a pemi ralkap (heroes) pawl philhlonak le upat pekni ah an hman deuhmi a si. Veteran’s Day tu ahcun a thimi he a nungmi he upatnak an pek hna.

Veteran’s Day hi Great Britain (UK), France, Australia, le Canada zong nih November 11 lai hrawng hin an hman ve. UK hna ahcun November zarh hnihnak zarhpini ahhin an hman theu. Hi nii ahhin, minit pahnih chung hrawng ralkap upatnak caah dai tein an um.

Source: www.history.com