London Sianghngakchia Nu (4) Syria Ram Ah An Lut

IS tapung pawl hi Middle East hrawnghrang minung lawng an si lo. Ram dangmi tampi nih IS tapung luh ve dingin an rak fuh hna.  A luancia kum thum chung i ram dangmi nih Syria le Iraq tapung sinah ai fonh mihi minung 20,000 hrawng an si. Hi ahhin minung 4,000 hrawng hi nitlak lei Europe ram mi an si. Nitlak lei Europe ram UK leiin a ra mihi a tam bik an si lai tiah an zumh. An tuak ningah UK minung 500 in 600 hrawng hi an si lai, an ti.

Kan hnu zarh hrawng ah London sianghngakchia nu (4) an thawngpang cu BBC news nih a rak thanh pah cang hna nain bia fiangin cun an thanh ve lo. UK ram an chuah taak i Turkey lei ah an kal. Cun, Syria ram chung zongah va luh i IS tapung sinah vai fonh khawh a si tiah, thinphang ngaiin an rak thanh cang. Tuni Feb 24 zong i BBC news le adang news web nih biapi in an thanhmi cu Syria ram chung luh i IS tapung i fonh khawh a si, ti hi a si. 

Kadiza Sultana, Amira Abase, le Shamima Begum

Hi hngakchia nu (4) nih an nu le pa cio an hlennak in Syria ram kal ding hi an rak i timhcia cang. Si khawh chungin palik nih an kawl len ko hna nain an hmuh kho thai hna loh. Palik bawi deuh (officer) pawl zong nih Turkey ram tiang an fuh ko hna nain an hmu kho ve hna lo. An nu le an pa siseh, an unau dang zong an ngaihchia. Hiti bantuk thil an tuah ding hi an chung le nih an rak i ruah lo ngai mi zong a si. Hika ahhin an chung le interview an tuahnak hna zoh khawh a si.

Hi nu (4) hna hi an hngakchia taktak. An muisam zohnak bang an si loh. Shamima Begum le Amira Abase hi kum 15 veve an si i Kadiza Sultana hi kum 16 a si. Nichuah lei London khua GCSEs sianginn ah ca cawng liomi an si. Ca zong an thiam ngai! An sianginn nih “straight-A students” an timi hna zong an si.

An i thawh ning cu hitihin a si. Feb 18, 2015 hrawng khan England ram airport Gatwick in Turkey ram Istanbul ah an zuang. Turkey ram an phak hnu hin Tukey le Syria karlak Kilis khua ah an va kal than. Kilis khua cu Refugee zong an tam ngai nak hmun pakhat a si. Khua chung palik a kawl hawltu pawl hrimhrim nih Turkey ram ah an um ti loh, Syria ram an lut cang tiah zumhnak an ngei. Syria ram chung an luh hnu cun IS tapung sin an vai i fonh ding hi a fawi tuk cang. Cu ruangah tihin an nu le pa cio le mipi an thinphang tuknak hi a si. 

England ram air port Gatwick in Turkey ram Istanbul an va phaknak

Hiti Syria ram an zam hi an mah thil ti khawh nakin a si lemlo. Syria ram phan kho dingin bawmchantu lampi ah an ngei. A luancia kum 3 chung hrimhrim ah Syria ram IS tapung hi nitlak lei Europe pawl nih an fuh tuk hna i lampi ah bawmchan tu an um lai ding cu a fiang. Syria ram an phak cang hnu cun UK le Turkey palik nih zeihmanh an tuah khawhmi a um ti lo. 

Turkey le Syram ram karlak khua Kilis

Ref: BBC