Jesuh Bantukin Thlacam

“Hnathiannak hmun ah khan a kaltak tawn hna i khika ah khan thla a va cam tawn.” Luka 5:16

Jesuh vawlei ah a um lio ahhin aa manh lo (busy) taktak. Thawngtha a chimpah, mizaw zong damter pah hna. A khualtlawn zong a tam. A cancan ah ti lawng aa cit, a can ah a ke in a kal. Khuaruahhar a tuahmi ruangah mipi nih kal awk tha lo tiangin voi tampi an buut . Cu lai lak ahcun kan fanu, ka fapa rak damter ta tiah an sawm lengmang fawn. Jesuh nunnak hi thawngtha cauk (Matthai-Johan) rel nakin aa manh lo taktak tihi a fiang tuk. Aa manh lo tuk ning hi ram thumnak ummi Laimi bantuk asi. Sihmanhsehlaw, Jesuh cu aa manh lo tuk ko nain thlacamnak caan aa ser peng. Cucaah, Jesuh hi thlacam nun a ngeimi asi, tiah kan chim khawh. Voikhat cu mipi sinin aa zukphiak i amah te lawng hmunking ah thla a va cam (Luke 5:16). Voikhat cu zingka te ah amah te lawng thla arak cam kha an hmuh (Mark 1:35). Cun, voikhat cu amah te lawng zaan khuadei in thla arak cam an hmuh than (Luke 6:12). Amah thiamthiam lawng voikhat cu tlang ah thlacam ah a kai than (Matt 14:23). Jesuh thlacam lengmangmi hi a zultu pawl an hmuh lengmang ruangah “Bawipa, thlacam kan chim” (Luke 11:1) tiah an halnak hi asi kho. Jesuh hi khuaruahhar tuah thiamnak an hal lo hih. Ti cung kal khawhnak, mizaw damter khawhnak le mithih thawhter khawhnak thawnnak an hal lo; thlacam tu an hal.

Zumtu ule nau hna, kannih zong Jesuh bantukin thlacam ve hna usih. Kan i manh lo tuk zongah thlacamnak caan hi cu kan pek hrimhrim a herh. Thlacam cu a Nungmi Pathian, vancung khua i a ummi kan Pa he biaruah asi. Jesuh nih a Pa he biaruahnak caan a ser. Kannih zong kan Pa he biaruahnak caan ser ve hna usih. A thluachuah lawng hi kan duh ding le kan bawh ding asi lo. Cun, kannih zong hi hawi sinin kan i zukphiak i kanmah te lawng Jesuh bantukin thlacam ve ding kan si. Kan innkhan chungte ah cam hi a tha bik. Cucu, kan caah hmunking asi ve ko. Cun, unau, a cancan ahcun kan phone, TV le computer hi thah (off) i kanmah te lawng vancung kan Pa he biaruahnak caan pek hi i tim ve cang hna usih.

Ruah Awk:

1.     Na thlacamnak hmunking khoika dah asi? Hawi sin in voi zeizatdah nangmah te lawng thlacam ruah ah naa zuhphiah?

2.     Naa manh lo tuk lio caan ah, zei tluk in dah Pathian sin ah thlacamnak hi caan hi na pek?