Daihnak Phun Thum

Bible chungah “daihnak” hi voi tampi kan hmuh. A voi in voi 790 hrawng kan hmuh. Daihnak hi Hebrew holh in “Shalom” ti asi. Galati 5:22-23 chungah Thlarau theitlai pakua kan hmuh i daihnak hi aa tal ve. Chim duhmi cu thawngtha kan zumhnak in Thlarau a tingcomi (Efesa 1:13) paoh nih cun daihnak hi kan ngeih hrimhrim awk asi. Nain, hi “daihnak” cu Jesuh Khrih he kan i peh lawnglawng ah kan ngei kho ve lai (Johan 15:4). Zeicatiah, Jesuh cu “daihnak Bawi” asi (Isaiah 9:6). Hi ruangah hin thawngtha kan zumhnak in Thlarau a tingcomi paoh nih cun daihnak kan ngei. Hi kan ngeihmi daihnak hi phun thum in rian kan tuanter a hau:

1.     Pathian he pumpak in kan i pehtlaihnak ahhin daihnak kan ngeih a hau. Pathian nih a Fapa ngeihchun a van thlahnak hi minung le Pathian kar ah daihnak kan ngeih khawh nakhnga ca’h zongah asi ve.

2.     Pumpak kan nun hrimhrim ah daihnak hi kan ngeih a hau. Kan philh lo dingmi cu, Pathian he pumpak kan i pehtlaihnak ah daihnak kan ngeih khawh hnu lawngah pumpak kan nun zongah daihnak kan ngei kho ve la. Pathian he daihnak ser kan i zuam hmasa a hau. Pathian he daihnak kan ngeih lo ahcun pumpak kan nun ah daihnak a um kho lo. Pathian he kan i hlat deuh paoh ah daihnak he kan i hlat deuhdeuh ve. Kan nun ah daihnak a um kho lai lo. Lungretheihnak le vansannak nih a kan tlak tawn lengmang ko la.

3.    Hawi he kan i hawikomhnak ah daihnak ngeih a hau. Kan nun ah daihnak a um lo ahcun hawi he kan i komhnak ah daihnak a um kho ve hoi lo. Kan nun ah daihnak a um lonak cu Pathian he kan i pehtlaihnak ah daihnak a um lo ruangah arak si. Hawi he kan i komhnak ah daihnak um seh; i dawh seh, tha seh ti kan duh ahcun “Daihnak Bawi” asimi Jesuh he kan i peh a herh hmasa lai. Pathian he daihnak ngei hmasa. Nangmah pumpak nunnak ah daihnak na ngei lai. Cu hnu lawngah na hawikom he zong daihnak na ngei kho la.

Ruah Awk:

1.     Nangmah le Pathian na i pehtlaihnak (relationship) ah daihnak na ngei maw? Na hnangam maw? Pathian he na i pehtlaihnak a thawng maw?

2.     Daihnak nun na ngei maw? Na nun ah daihnak a um maw?

3.    Hawi he nan i pehtlaihnak ah daihnak na ngei maw? Hawi he daihnak a ngeimi cu hawi he daw le rem tein khuasa khomi an si.

4.     Hi daihnak phun thum chungah hin zei hi dah na chambau biknak asi?

5.     Daihnak nun ngeih na duh maw? Na duh ahcun nangmah pumpak in Pathian hmaiah zing he zan he Bible relnak le thlacamnak in caan na hmang law na ngei ko la. Pathian cu naih law an naih ve lai (James 4:8).