Chungkhar Damnak Sii Tha Bik

Tuchun thaithawh ka ei lio ka sayapa ka pawng ah a rak thu. "Ziah, nai suah ve lo?” tiah ka hal. Kan saypa nih cun, “ka rawl a ttam ngai ko nain kan nu he dawr ah thaithawh ei dingin kan i ching” tiah a ka leh. Kan saypa le a nupi cu kum 30 an i tthit-umhnak a si cang. Fa paruk an ngei; tule fa pali an ngei rih. Ka chim duhmi cu, kum 30 chung an i tthi-umhnak asi cangmi nupa hna an i dawtnak hi a si. Laimi kan u le nih i cawn kho ve ulaw kan duhpiak tuk hna. Cheukhat nih cun a herh lo ah kan ruah sual ko men la. Nain, dawtnak hri a fehtertu le chungkhar dawtnak a chuahtertu cu hi bantuk thil hme tete ah kan rak ruah sualmi hi an si. 

Laimi kan u le zong nan fale kha kaltaak chung uhlaw, i ching ve uh. Caan tha va hmang uh. Nan nungak tlangval lio bantukin vai nuam uh. Nan rak i duhdawt lio i zaan fatin phone chungin nan phaittimi bia thlumthlum vialte hna kha khoidah an um dih? Inn chungkhar ah nulepa bik nan i dawt ahcun nan fale cu i daw loin um hrimhrim lai lo. Nupi le hna Bawipa Jesuh tangah nan i toidor bantukin nan vale tangah i dor u (Efe. 5:22). Vale hna, Jesuh nih Khrihfabu cu a dawt i a nunnak tiang a pek bantukin, nannih zong nih nan nupile kha nan dawt hna awk a si (5:25).

Cathiang nih fiang tukin a kan cawnpiakmi cu hihi a si. "Mi zeimaw nih, 'Pathian ka dawt,' a ti i a unau a huat ttung ahcun, amah cu mi lihchim a si. Zeicatiah a hmuhmi a unau hmanh a dawt khawh lo ahcun a hmuh lomi Pathian cu a daw kho lai lo." 1 John 4:20 

Pathian kan dawt kan ti tung i, kan nupi le kan dawt hna lo ahcun Cathiang nih milihchim nan si a kan ti. Bawipa kan tihzah kan ti tung i, kan mithmuh kan vale hmanh kan tihzah, kan upat khawh lo ahcun Cathiang nih milihchim a kan ti. Pathian nih dawt ding le tihzah upat ding in a kan pekmi mithmuh kan nupi le kan vale hmanh kan dawt in kan tihzah khawh lo ahcun zeitindah kan hmuh kho lomi Pathian cu kan dawt i kan tihzah khawh lai? Hi bantuk mi kan si sual ahcun Bawipa kan dawt, kan tihzah, tiah kan i chim ding zong a si lo. Mithmuh khawh lo Pathian kan dawt le kan upat tihzahnak cu, kan vale le, kan nupi le cungah kan langhter ding a si. Cucu, chungkhar damnak sii tha bik a si ko. Cun, kan unau hawile kom cung zongah langhter ding hi a biapi tuk!